Canzoni Napoletane - Tarantellucia lyrics

(E.MUROLO - FALVO)

Na casarella

pittata rosa,

'ncopp''e Camaldule,

vurría tené:

Piccerenèlla,

p''o sposo e 'a sposa:

comm'a na cònnola

pe' me e pe' te...

-"Tùppete-ttùppete!"

mme ritirasse...

Tu, verbigrazia,

vien'a arapí...

Cu 'ammore, é facile

tutt''o ddifficile...

Si ha da succedere,

succedarrá!

Na luggetèlla

'nfucata 'e sole,

cu 'aruta e 'anèpeta

piantate 'a te...

'Sta faccia bella,

'mmiez'ê llenzole

spase pe' ll'ásteco,

vurría vedé...

Vurría annascónnerme

quanno passasse...

pe' fá, vasánnote,

cucù-setté...

Cu 'ammore è facile

...................

Na cunnulélla...

Ninno picciuso...

'Nfaccia doje frávule:

gulío 'e mammá...

'Gnóra vavella,

cu n'uocchio a 'o fuso,

canta, vucánnolo:

"Michelemmá..."

Notte e silenzio...

Lietto sincero...

Doje bracce strégnerme

vurría sentí!...

Cu 'ammore è facile...